100.000 долларын цалинтай Оюутолгойн ТУЗ-ийн гишүүдийг огцруулна

Өнгөрсөн долоо хоногийн баасан гаригийн үдээс хойшхи хуралдаанаар УИХ-ын гишүүн Ц.Даваасүрэн, Б.Бат-Эрдэнэ, Х.Болорчулуун, С.Ганбаатар, Г.Уянга, Л.Цог нараас Оюутолгой төслийн хэрэгжилтийн өнөөгийн явц, татвар төлөлтийн байдал болон “Эвлэрлийн гэрээ”-ний талаар Ерөнхий сайд Ч.Сайханбилэгт тавьсан асуулгын хариуг сонссон. 
 
Энэ үеэр Оюутолгойн ТУЗ-ийн гишүүдийн цалингийн хэмжээ олон нийтэд тодорхой болсон юм. Тодруулбал, УИХ-ын гишүүн Г.Уянга Оюутолгойн ТУЗ-ийн гишүүдийн цалингийн хэмжээг асууж, тодруулсан. Энэ үеэр тус зөвлөлийн гишүүд 100 мянган долларын цалинг жилд хуваан авдаг гэх хариултыг өгсөн юм.
 
Тэгвэл эдгээр гишүүдийг огцруулах асуудлыг хөндөхөөр болсноо Г.Уянга гишүүн мэдэгдлээ. 
 
Тэрбээр "Оюутолгойн ТУЗ-д Монголын 34 хувийг төлөөлдөг Да.Ганболд, Б.Бямбасайхан Ч.Отгочулуу нар жилд 100 мянган долларын цалин авдаг. Мөн тэд "Эрдэнэс Монгол", "Эрдэнэс-Оюутолгой" компанийн захирлынхаа хувиар төрөөс өндөр цалин сард авдаг. Оюутолгойгоос авдаг бусад шагнал, урамшил, хангамж, аялал зугаалгыг нь мэдэхгүй юм. ОТ-оос өндөр цалин хангамж хүртдэг учраас тэнд Монголыг төлөөлөх биш, харин эсрэгээр Монголын төрд ОТ-г төлөөлөөд байна. Ийм байх ёсгүй. Монгол өөрсдийн хүмүүсээ цалинжуулж, тэднийг хянуулж, эрх ашгаа төлөөлүүлэх ёстой. Энэ гурвыг буцааж татах асуудлыг тавих болно. Тэд дээрх авдаг мөнгөндөө Монголыг худалдаж байна. Тэдний авч байгаа бүх мөнгөний 34 хувийг бид өндөр хүүтэй зээлээр төлж байгааг мартаж болохгүй. Тэд төслийн өндөр зардалд хувь нэмрээ оруулж байна!. Мөн МУ ноогдол Оюутолгойгоос ноогдол ашгаа 2037 оноос авна гэлээ!!! Үүнийг хэдэн хүн зөвшөөрч байна. ТЭЗҮ 2015-д хяналт хийсэн эрдэмтдийн ярьж байгаагаар Монгол энэ төслөөс ашиг авахааргүй болсон гэж байна билээ. Би тэдэнд итгэж байна. Тооцоо, үндэслэгээг удахгүй гаргаж тавих болно" гэв.