Зам тээврийн сайд М.Зоригт МИАТ компанид халаа, сэлгээ хийж эхэлжээ. Ингэхдээ тэрбээр өмнө нь МИАТ-ын захирлаар ажиллаж байгаад хувьдаа мөнгө завшсан хэргээр ял сонссон Ц.Орхоныг  буцаан Нисэхийн салбарт нь томилсон байна.

Тэрээр энэ талаараа “Ц.Орхон гэдэг залууг авч ажиллуулах эсэх талаар ярилцлахад хүмүүс болохгүй гэж байсан. Гэтэл би ажилд нь томилчихсон л байна шүү дээ. Үнэн хэрэгтээ Ц.Орхон мөнгө завшиж, авлига авсан хүн биш. Харин тийм үйлдэл хийж байхыг анзаараагүй. Тэгээд үүнийхээ төлөө ял эдэлсэн хүн шүү дээ. Үүгээрээ олныг хамарсан санал асуулга явуулж, шийдвэр гаргах нь чухал гэдгийг харуулахыг хүссэн. Яагаад гэвэл хүнийг алдсан гэж түлхэхээс илүүтэйгээр мэдсэн, сурсныг нь Монголын төр дайчилж ашиглах хэрэгтэй. Иргэний агаарын тээвэрт томоохон хоёр зорилт тавьсан. Үүнийг хийж гүйцэтгэхийн тулд би ганцаараа чадахгүй. Тэгэхээр чадварлаг мэдлэгтэй, туршлагатай хамт олонтой баг бүрдүүлэх учиртай” гэжээ.

Хэргийг сануулбал,  “Дайны эрсдлийн сан” гэх нэрийдлээр зохиомол даатгалын компаниуд руу МИАТ-ийн их хэмжээний мөнгийг гуйвуулж, мөнгө завшиж, угаасан хэргээр, Анхан болон давж заалдах шатны шүүхээс “МИАТ” компанийн захирал асан Б.Эрдэнэбилэг, Ц.Орхон, Б.Бат-Эрдэнэ, дэд захирал асан Ч.Хоролсүрэн, “Голомт” банкны зургадугаар салбарын захирлаар ажиллаж байсан Г.Саранчимэг нарт тус бүр 11-14 жилийн ял оноосон ч Улсын дээд шүүхээс тэдний ялыг 7-8 жил болгон бууруулсан байдаг.

Эдгээр хүмүүс 2007-2009 оны хугацаанд 9.1 тэрбум төгрөгийг "Дайны эрсдэлийн сан" нэрээр завшсан нь Шүүхээр тогтоогдсон юм. Харин Б.Эрдэнэбилэг, Ч.Хоролсүрэн нар хоёр жил ял эдлээд, эрүүл мэндийн шалтгаанаар суллагдсан. Тэд биеийн байдал муу хэмээн шүүхэд хүсэлт гаргаснаар шүүгчийн захирамжаар ялаас бүрэн чөлөөлөгдсөн байдаг.

Харин УИХ-ын дарга З.Энхболд өөрийн цахим хуудсаараа энэ томилгоог эсэргүүцэж байгаагаа  М.Зоригт сайдад уламжилжээ.

                                                      Эх сурвалж: 24tsag.mn