“Эрдэнэс Тавантолгой” компанийн ТУЗ-ийн дарга асан Г.Дэнзэнг албан тушаалаа урвуулан ашигласан, аж ахуйн нэгжийн өмчийг завшиж үрэгдүүлсэн байж болзошгүй хэмээн сэжиглэн саатуулж, АТГ-аас шалгаж байгаа. Өнгөрсөн тавдугаар сарын 21-нд АТГ-ынхан баривчлаж, ШШГЕГ-ын харьяа Цагдан хорих 461 дүгээр ангид хорьсон бөгөөд хорьж шалгах хоёр сарын хугацаа нь долдугаар сарын 20-нд дуусчээ. Түүнийг мөрдөн байцаалтын явцад саад учруулж болзошгүй гэж шүүх үзсэн тул дахин нэг сар хорьж шалгах шийдвэрийг гаргаад байгаа. Харин энэ шийдвэрийг эсэргүүцсэн Г.Дэнзэн өнөөдрөөс эхлэн өлсгөлөн зарлаж эхэлснийг эх сурвалжууд мэдээлж байна.
 
Г.Дэнзэн нь долдугаар сарын 21-нд өлсгөлөн зарлах тухай өргөдлөө ШШГЕГ-ын харьяа Цагдан хорих 461 дүгээр ангийн захиргаанд өгчээ. Энэ үед ангийн захиргаа түүнийг өлсгөлөн зарлахад эрүүл мэндийн хувьд тэнцэхгүй гэсэн хариу өгч, зөвшөөрөөгүй аж. Учир нь, тэрээр гурван удаа шарлаж байсан юм байна. Гэвч Г.Дэнзэн өчигдөр өлсгөлөн зарлах тухай өргөдлөө дахин өгчээ. Түүний өргөдлийг хорих ангийн удирдлагууд хүлээн авах эсэх нь тодорхойгүй байгаа ч өнөөдрөөс Г.Дэнзэн хоол идэхгүй байхаар шийдсэн гэнэ. Тэрбээр хэд хоногийн өмнө гурван байгууллагад зургаан заалт бүхий шаардлага тавьжээ. Энэхүү шаардлагыг нь биелүүлж, өөрийнх нь эрхийг хангахгүй бол өлсгөлөнгөө үргэлжлүүлнэ гэдгээ ч мэдэгдсэн байна.

                                                  Эх сурвалж:24tsag.mn