УИХ-ын чуулганд МАН-ын бүлгийн дарга С.Бямбацогт үг хэллээ.

“Монгол Ардын Нам намаа, ирэх жилийн сонгуулиа  бодсон бол АН-тай хамтарч ажиллах хэрэггүй байлаа. Манай намыг АН-тай хамтраад  хэрэггүй байсан юм  гэсэн яриа ч ард иргэдийн дунд байна.  Ардчилсан намын дарга З.Энхболд та анх ярихдаа Ерөнхий сайд Н,Алтанхуяг засгийн газрыг удирдаж чадахгүй нь ээ,улс орныхоо эрх ашгийг дээдэлж  хоёр нам хамтарч ажиллая гэсэн санал хэлж байсан чинь одоо ч чихэнд сонсогдож байна. Таны ой санамж ийм амархан муудаж,ярьсан хэлсэнээ умартаж байгаад гайхаж байна.Манай нам Засгийн газарт ажилласан 6 сарын хугацаанд  гадаадын хөрөнгө оруулагчдын итгэл сэргэн Монгол улс нэг төсөвтэй болж, дарга нэртэй, данхайсан бүтэцтэй төрийн албаны  тансаг хэрэглээг багасгаж,эдийн засгийн  хүндрэлээс гаргах хөтөлбөрийг санаачлан батлуулж, иргэдийн орон сууцны урьдчилгаа төлбөрийг 10 хувь болголоо. Хууль бус мод бэлтгэлийг зохицуулах эрх зүйн орчинг бий болгон, Зайсангийн уугуул иргэдийн газрын  асуудлыг шийдэж өглөө.Тавантолгой төсөлд ард түмний эрх ашиг оролцоо бус, Ардчилсан намын бүлэглэлүүдийн эрх ашгийг тусгах гэж хамаг цаг хугацаагаа алдлаа, Хөрөнгө оруулагчидтай зүй бус,бүдүүлэг харьцсаны хохирол, хор уршгийг ард нийтээрээ  амсаж байна.  Ардчилсан нам хар машиндаа найдаж байгаа бол Ардын нам, ард түмэндээ итгэж байгаа.

Ардчилсан намын хууль бус үйл ажиллагаатай Ардын нам санал нийлээгүй нь гэрээ биелээгүй гэдэг шалтгаан болгож  засгаас шахан гаргаж байна. Ардчилсан нам ардчилалын 25 жилийн хугацаанд хоёр удаа төр барьж, олуулаа хөгжих биш цөөхүүлээ хөлжиж, дүр эсгэсэн ардчилал дарангуйлагчдаас хортой гэдгийн  бодит жишээг харууллаа. Цаашдаа Засгийн газрын зөв бодлогод ташуур, буруу үйлдэлд хазаар болж, Ардын нам, ард түмэнтэйгээ хамт Ардчилсан намын үйл ажиллагаанд хатуу хяналт  тавьж ажиллана” гэв.