УИХ-ын гишүүн Н.Алтанхуягын  нэр дээр Тагнуулын ерөнхий газрын Мөрдөн байцаах хэлтсээс зарлан дуудах хуудас ирүүлсэнтэй холбогдуулж тодруулга гаргуулахаар Ерөнхий сайд Ч.Сайханбилэгт ханджээ.

Н.Алтанхуяг гишүүн Ерөнхий сайдад хандаж хүргүүлсэн албан тоотдоо, "Н.Алтанхуяг миний нэр дээр энэ оны 6 дугаар сарын 3-ны өдөр Тагнуулын ерөнхий газрын Мөрдөн байцаах хэлтсээс зарлан дуудах хуудас ирүүлж, хэрэв дуудсан хугацаанд ирээгүй тохиолдолд албадан ирүүлэх тухай заасан байсан. Тус бичгийг хүлээж аваад тагнуулын байгууллагын үйлдлийн талаар Ерөнхий сайд таниас тодруулахад, "Би ярьлаа, очих шаардлагагүй" гэсэн. Өнөөдөр 6 дугаар сарын 29-ний өдөр Тагнуулын ерөнхий газраас дахин зарлан дуудах хуудас ирүүлжээ. Тагнуулын ерөнхий газар нь Ерөнхий сайдын шууд харьяаны агентлаг тул ямар асуудлаар дуудаж байгаа талаар тодруулга бичгээр гаргаж өгнө үү. Улс орны аюулгүй байдал болон төрийн үйл ажиллагаатай холбоотой ямар ч асуудлаар тодруулга өгөхөд бэлэн байна" гэжээ.