Малайзын Селангор мужийн Пералинг дүүргийн Дамансара хотод байрлах Бандар Ютама дүүрэгт Монгол эмэгтэй халдлагад өртсөн байна. Уг хэрэг өчигдөр оройн 17:45 цагийн орчимд гарчээ. Гэрчүүдийн мэдээлснээр мотоцикль унасан буутай хоёр этгээд 4WD дамжуулалттай жийп рүү гал нээсэн гэнэ.
 
Машин дотор хохирогч эмэгтэй байсан бөгөөд цээж мөрөндөө 4 удаа буудуулсан байна. Энэхүү буудалцааны үеэр өөр нэгэн мотоцикльтой хүн ирж гэмт этгээдүүдийн үйлдлийг зогсоож, 26 настай монгол эмэгтэйн амийг аварчээ. Түүнийг Датук гэдэг 35 настай бизнесмэн гэнэ. Гэмт этгээдүүд машины цонх руу нийт 8 удаа гал нээсэн болохыг цагдаагийн газраас тогтоосон байна. Гэмт эдгээдүүд 9 мм-ийн диаметртэй гар буугаар буудсан аж. Мөн гэмт этгээдүүдийг эрэн сурвалжилж байгаа юм байна.
 
Гэмтэл авсан эмэгтэй Малая их сургуулийн Эрүүл мэндийн төвд хэвтэн эмчлүүлж байна.