Олон улсад хэрэглэхийг зөвшөөрсөн "1", "5"  гэсэн тэмдэглэгээ, код бүхий хуванцар савыг айраг, сүү, цагаан идээ, ундны ус хадгалах зориулалтаар ашиглаж болохыг МХЕГ-аас иргэдэд анхааруулж байна.
Харин "3", "6", "7"  тэмдэглэгээ, кодтой болон огт тэмдэглэгээ, кодгүй хуванцар савыг ашиглахгүй байх, "2", "4" гэсэн тэмдэглэгээ, кодтой бол хэрэглэхээс  аль болох татгалзах нь зүйтэй юм. Эдгээр саванд үлдсэн хар тугалга болон бусад химийн бодис хүний биед хуримтлагдаж, мэдрэлийн системийг хордуулах өвчлөл үүсгэх эрсдэлтэй. Иймээс дээрх тэмдэглэгээ, кодтой саванд савласан сүү, цагаан идээ, айраг зэргийг худалдан авахгүй байхыг хэрэглэгчдэд сэрэмжлүүлж байна.

Өнгөрсөн  жил улсын хилээр оруулсан  химийн бодисын хэмжээ 2013 онтой харьцуулахад 31 хувиар нэмэгджээ. Харин 2014, 2015 оны эхний 5 сарын байдлаар 17325 ширхэг хуванцар савтай химийн бодис оруулсны 52 хувь нь урд хөршөөс иржээ.

“Нарантуул”, “Хархорин” захад зарж буй хуванцар савны  83  хувь нь хуучин сав байгаа нь Мэргэжлийн хяналтын байгууллагаас өнгөрсөн сард хийсэн тандалт судалгаагаар тогтоогдсон байна. Худалдаж байгаа савны 96 хувь нь хүнсний зориулалтын бус бөгөөд 72 хувь нь 20-50 литрийн багтаамжтай байна. 

Мэргэжлийн хяналтынхан мөн өнгөрсөн онд “Нарантуул” захад худалдаж байгаа 10-120 литрийн багтаамжтай, хүнсний зориулалтын бус 7 төрлийн хуванцар савнаас дээж авч шинжилжээ. Ингэхэд савнууд дахь аммиакийн агууламж 48 дахин их гарсан нь зөвшөөрөгдөх хэмжээнээс 27 дахин их гэсэн үг юм. Хуванцар саванд хүнсний бүтээгдэхүүний хадгалах хугацаа нэмэгдэх тусам химийн бодис нэмэгдэж байгааг шинжилгээгээр тогтоосон байна. Мөн хүнд металл, хар тугалганы үлдэгдэл сүү, айрганд зөвшөөрөгдөх хэмжээнээс 3-4 дахин их агууламжтай гарч байжээ.