ЭЦГ хар тамхины хэрэгт 20 гаруй хүнийг холбогдуулан баривчлан цагдан хорьж, хэргийг шалгаж байгаа тухай мэдээлсэн билээ. Эдгээр сэжигтний дотор Хар тамхи үйлдвэрлэж байсан этгээдүүд ч илэрчээ. Хар тамхи үйлдвэрлэгч этгээдүүд гадаадын иргэнтэй хамтран жижиг үйлдвэрийн цехдээ хар тамхины төрлийн гашиш болон каннабисын давирхайг ялган авч, нунтаглах аргаар боловсруулан баримлын шавар мэт болгон бэлддэг байжээ. Уг бэлдмэлээ өндөр үнээр борлуулдаг өөрийн захиалагч, худалдан авагч сүлжээ ч үүсгэсэн байсныг илрүүлэн шалгаж байгаа юм. Тиймээс нэлээд олон хүнийг хамрах төлөвтэй байгаа аж. Хар тамхитай холбогдсон хүмүүсийг гэрээс нь, хилээр орж ирэхэд нь, "мөс"-өө бусдад худалдах гэж байхад нь гээд олон төрлийн аргаар баривчилснаа цагдаагийн эх сурвалж мэдээллээ.  Улаанбаатар хотын нэгэн дүүрэгт хар тамхи боловсруулж, бэлдээд худалдаалдаг болохыг хөдөлшгүй баримтаар тогтоов.