Д.БЭХИ

Үндэсний их баяр наадмын торгон дэвжээ Төв цэнгэлдэх хүрээлэнд хиймэл зүлэг суулгаж эхэллээ. Өнгөрсөн сараас эхэлсэн энэ ажилд нийтдээ тэрбум 200 сая төгрөг зарцуулахаар төлөвлөжээ. Гэхдээ энэ зардал мөнгийг төсвийн хөрөнгөөр санхүүжүүлээгүй гэдгээ яаран зарлажээ. Санхүүжилтийг "Төв цэнгэлдэх хүрээлэн" компанийн хувьцаа эзэмшигчдийн хөрөнгөөр хийж байгаа юм байна.

Төв цэнгэлдэхийг битүү хиймэл зүлгээр хучихаас гадна ус зайлуулах хоолой тавьж, тохижуулах ажил хийж байгаа аж. Мөн хөнгөн атлетикийн тэмцээн уралдааны зориулалтын зам ч тавих юм байна.  Ингэж олон улсын стандартад нийцсэн хиймэл зүлэгтэй болгон тохижуулснаар Төв цэнгэлдэх байнгын үйл ажиллагаатай болж, спортын тэмцээн уралдаан зохион байгуулах боломжтой болно гэж хөрөнгө оруулагчид нь найдаж байгаа аж.

Хиймэл зүлэгтэй болгох саналыг Үндэсний их баяр наадам зохион байгуулах комисс дэмжиж, Монголын Үндэсний бөхийн холбоо хэсэг бөхчүүд барилдуулан туршиж үзсэний дараа хүлээн зөвшөөрсөн байна.