Д.БЭХИ

Сүүлийн үед Таван толгойн хийгдээгүй гэрээ иргэдээ төдийгүй төр, засгийг тэргүүлж байгаа хүмүүсийг ч талцуулаад байгаа билээ. Ялангуяа, нам дотроо багагүй жин дарж, аливаа асуудалд нэлээд нөлөөтэй байдаг УИХ-ын дарга З.Энхболд хэсэг нөхдийн хамтаар буруу харж суучихаад, бүлгийнхээ гишүүдтэй эл асуудалд ам хэлээ нэг л сайн ололцохгүй байгаа гэх. Өөрөөр хэлбэл, гэрээний төслийг нэг их эвдэхгүйгээр дэмжээд явах бүлгийн гишүүдийнхээ саналыг тас цохиж, тодорхой асуудалд өөрчлөлт оруулахыг шаардаж байгаа юм.

Гэтэл спикер энэ сарын 8-нд “П.Очирбат гуай Ард тумний ТТ-г Энержи Ресурст ег гээд загнаад байсан еерее ТУЗ-д нь байдаг 24000$ цалин авдаг байжээ” гэсэн жиргээ цацаж 293 ретвит авсан байна.

Харин Энержи Ресурс ХХК /ММС/-ийн 2014 оны тайланд П.Очирбатыг  тус компаниас  сар бүр цалин авдаг талаар дэлгэрэнгүй бичжээ. Түүнийг захирлуудын зөвлөлийн гишүүд 2010 оны есдүгээр сарын 16-нд нэр дэвшүүлснээр уг албанд томилсон гэнэ. Түүнийг Урамшууллын хорооны дарга, Аудит болон нэр дэвшүүлэх хорооны гишүүнээр тус тус ажилладаг талаар ММС-ийн тайланд бичсэн байна.

Тайланд бичсэнээр Үндсэн хуулийн цэцийн гишүүн, Энержи Ресурс ХХК-ийн зөвлөхөөр ажилладаг П.Очирбат тус компаниас 24.000 ам.долларын цалин авдаг аж.

Тэгвэл тэрбээр АТГ-т мэдүүлсэн 2014 оны Хөрөнгө орлогын мэдүүлэгтээ 60824.49 /мянган төгрөг/ орлоготой, гэр бүлийн гишүүдийнх нь орлого 2966.69 төгрөг гэнэ. Түүнчлэн хувьдаа орон сууцгүй бөгөөд эзэмшлийн 24240.00 төгрөгөөр үнэлэгдэх хоёр газар /700 м2, 1157 м2/, 40000.00 төгрөгийн үнэтэй Тоёота Ланд-100 маркийн автомашинтай. Мөн 90000.00 төгрөгөөр үнэлэгдэх мал, аж ахуйтай, хадгаламжиндаа 2211400.00 төгрөгтэй гэж мэдүүлэг өгсөн нь анхны ерөнхийлөгчийг асныг Авлигатай тэмцэх газарт хүргэх бололтой.