Нийслэлийн Сонгинохайрхан дүүргийн 9 дүгээр хорооны иргэн Э-гийн хашаанд    2015 нэгдүгэр сарын 28 нд  лам хүний занданшуулсан шарил худалдагдах гэж байсныг цагдаагийн байгууллага илрүүлэн холбогдох газар нь хүлээлгэн өгч байсан билээ. СГЗ, бурханч лам Г.Пүрэвбат:  “Хутагт хувилгаан, гэгээнтнийг оршуулах зан үйлийн дагуу занданшуулсан шарил байна. Очир завилгаагаар суулгасан, зүүн мутрыг тэгш атгуулж, баруун мутрыг ном номлохын ерөөлтэйгээр өргүүлж  зохих журмын дагуу сайтар занданшуулсан шарил байна. Орон нутгийн сүм хийдүүд нутаг нугадаа  байгаа тэрхүү шүтээнээ байр савандаа байна уу үгүй юу гэдгийг  эргэж тойрч үзэхэд илүүдэхгүй байх. Нууцлаг шүтээнийг нь ухаж аваад  ирсэн байх вий” хэмээж байсан билээ. Гэтэл  Архангай аймгийн Цахир сумын нутаг  Содномдаржаа уулын оройд хадгалагдаж байсан Гэсэр ламын шавь Цорж Санжжавын бунхан хөндөгдөж, шарил нь алга болсоныг нь олж тогтоосон билээ.Олон хоног сараар хүлээгдсэн шарилыг өнөөдөр нутаг усанд нь буцаан залах шийдвэр  гарлаа.Цорж Санжжавын занданшуулсан шарилыг   сэргээн засварлаж  орон нутагт нь буцаан залж  олон нийтэд сурталчлан таниулах ажлыг зохион байгуулахад зориулж 164 сая төгрөгийг Засгийн газрын нөөц сангаас гаргахаар болсон байна .