Одоогоос 10 гаруй жилийн өмнө манай нэг найз Япон улсад сурч байсан юм. Хичээлээ тараад оройн ээлжний ажил хийдэг байсан болохоор өглөө нь хичээл дээрээ унтчихдаг. Тэгсэн багш нь нэг өдөр ганцаарчилан дуудаж уулзаад би хичээлээ сонирхолгүй, муу зааж байгаагаас болж чи хичээл дээрээ унтаад байх шиг байна, би яаж заавал чамд сонирхолтой байх вэ гээд асууж. Тэрийг нь анх бид хэд сонсоод учрыг сайн ойлголгүй инээгээд л өнгөрч билээ.

Гэхдээ энэ нь Япон улсын хөгжлийн үндэс, Япон хүний амжилтын нууц нь байсан байх. Хүн ямарч ажилтай байж болно. Энгийн цэвэрлэгч эсвэл удирдах ажилтан бай. Хэрэв алдаа гаргасан бол тус бүр өөрийн алдаагаа хамгийн хурдан олж, түүнийгээ засч, ажлаа хамгийн сайнаар хийх гэж хичээх нь хувь хүнийг улам илүү хөгжүүлнэ.

Хүн бүр ажлаа хамгийн сайнаар хийх тусам бүтээмж тэр хэрээр нэмэгдэж, нийгмийн хөгжилд өөрийн бага гэхгүй хувь нэмрээ хүргэнэ. Хувь хүн өөрөө л хөгжихгүй бол нэг ч дарга сайд таныг хөгжүүлэхгүй. Хэн нэгэн гадны хүн сайн болгочихгүй.

Тэгээд ч "хүнд найдсан ажил бүтдэггүй, айлд тавьсан мал өсдөггүй" гэдэг. Хувь хүн өөрөө л хичээх хэрэгтэй.