Монгол Улсын далбааг мандуулсан 450 гаруй усан онгоц гадаад далайгаар аялж яваа гэж Далайн захиргаанаас мэдээлж байсан.  Тэдний нэг загас агнуурын   “Thunder” нэртэй хөлөг онгоц Африкийн баруун хэсгийн далайд живжээ. Уг онгоцыг хулгайгаар загас  агнадаг гэж  “Sea Shepherd” байгаль хамгааллын байгууллагаас мэдэгджээ. Тус байгууллагынхан   хоёр усан онгоцтой 110 хоног загасчидтай нүд алдам их далайд хөөцөлджээ. Өчнөөн хоног  “муур хулгана болж” хөөцөлдсөн “Thunder” хөлөг даваа гаригт живсэн гэж байгаль хамгаалагчид мэдэгдсэн байна. Хууль бус загас агнуурын “Thunder”  хөлгийн ахмад нь  Чили хүн байсан гэнэ. Хөлөг онгоцон дээр нийт 40 хүн байсны 30  орчим нь Индонезийн иргэд байсан аж.  “Sea Shepherd” байгаль хамгааллын байгууллагынхан  “Thunder” хөлөг онгоцыг хулгайгаар ховор төрөл зүйлийн загас агнуур хийхээс сэргийлэх үүднээс дөрвөн сарын турш ажиглан хөөцөлдсөн гэж мэдэгджээ.

Эх сурвалжийн мэдээлснээр, “Thunder” хөлгийг Шинэ-Зеланд улсын хүсэлтээр 2013 оноос эхлэн Интерполоор эрэн сурвалжилсан  байна. “Интерпол”-д мэдээлснээр “Thunder” хөлгийг эзэмшигчид зохион байгуулалттай гэмт бүлэглэл байх магадлалтай аж.  2006 оноос хойш хулгайн загас агнуураар 60 сая ам.доллар олсныг нь тогтоожээ.  Тус хөлөг хууль бус үйлдлээ нуухын тулд  Монгол, Нигери зэрэг хэд хэдэн улсын далбаан дор загас агнуур хийдэг байсныг илрүүлсэн байна. Хууль бус үйл ажиллагаа эрхэлдэг хөлөг онгоц яагаад Монгол Улсын далбаа мандуулж явсныг шалгаж тогтооно гэдэгт найдъя.

Эх сурвалж: The guardian.com