Мэргэжлийн сүмо бөхийн хару башё өндөрлөж их аварга хакухо Даваажаргал, Харумафүжи Бямбадорж нарын аваргууд барилдсан. Харин ёкозүна Ананд бэртлийн улмаас башёг өнжсөн билээ. Башёгийн дараа уламжлал ёсоор сүмогийн холбооныхон хуралдсан байна. Хуралдаанаар 34 дэх түрүүгээ хүртсэн Хакүхо аваргыг магтсан бол таван унаатай ёкозүна Харумафүжиг шүүмжлэлгүй өнгөрсөн байна. Харин  13 давж түрүүлэх хэмжээнд барилдсан Тэрүнофүжи Г.Ган-Эрдэнийг тавдугаар сарын башёд 14 давсан тохиолдолд озэки цолыг шууд олгоно гэсэн болзол тавьжээ. Озэки цолыг сэкиваке цолтой бөх гурван башё дараалан нийтдээ 33 болон түүнээс дээш давсан тохиолдолд олгодог ч Тэрүнофүжид заавал гурван башё гэх болзол тавих хэрэггүй хэмээн сумогийн холбоо үзжээ.