''Үндэстэн'' телевизийн захирал Т.Дагвадоржийг ямар ч шалтгаангүйгээр зодож танхайрсан хүмүүсийг цагдаагийн байгууллага эрэн сурвалжилж байна. Өнгөрсөн баасан гаригийн их үдийн алдад нийслэлийн Сүхбаатар дүүргийн шүүхийн гаднаас том биетэй хоёр залуу түүнийг өмдний тэлээснээс нь өргөж хүчээр авч яваад  Приус маркийн машинд чихэж суулгажээ. Тэд явсаар 7  буудлын ойролцоохь  Петровисийн шатахуун түгээх станцын хажуудах хүнсний дэлгүүрт иржээ. Хүчинд автсан залуу чухам юу болоод байгааг ойлгосонгүй. Тэгтэл тэд  архи авч гарч ирээд Дагвадоржийн  ам руу архийг хүчээр цутгаж уулгажээ. Тэгээд цааш давхисаар хээр аваачиж, хэрцгийгээр зодсон байна. Түүнийг хүч хэрэглэн авч явсан хүмүүс ''Чи яасан их үндсэрхэг үзэлтэй хүн бэ, эхнийх нь чи шүү'' хэмээн элдвээр дарамтлан доромжилсон байна. Түүнийг ухаан баларттал нь зоджээ. Нэг мэдэхэд Дагвадорж аль нэг байгууллагын ОО-ийн өрөөнд байсан гэнэ. Тэнд яаж ирснээ ч санахгүй байжээ.  Хоёр залуу түүнийг сэрээж, гэрээ заагаад өгөөч, хүргээд өгье гэхэд нь сэржээ. Сайн санаат хоёр залуу түүнийг гэрт нь хүргэж өгсөн байна.  Түүний хэр зэрэг гэмтсэнийг  үзлэг хийсэн Гэмтэл согогийн үндэсний төвийн эмч нар хэлэх байх. Түүнийг хэн хэрхэн хүчээр явсныг харсан  болон утсандаа бичиж үлдээсэн хүмүүс байвал 98204320 утсанд яаралтай мэдээлнэ үү. Мэдээллийг чандлан нууцална. Т.Дагвадорж бол Монголын Бөөгийн нэгдсэн эвлэлийн дээд цэцийн гишүүн. Өөрийн эзэмшлийн Үндэстэн ТВ-ээр “Тэнгэрийн цаг” нэвтрүүлгийг 6 жил хариуцан бэлтгэж үзэгч олондоо  хүргэж байгаа тэнгэр үзэлтэй, шударга залуу юм. Тэрээр маргааш нь  болох Монголын Бөөгийн нэгдсэн эвлэлийн дээд цэцийн хуралд илтгэл тавих байжээ. Газар нутгаа хамгаалахаар боссон иргэдийг  нухчин дарах  гэв үү. Эх орон,газар шорооныхоо төлөө тэмцлийг мохоох гэсэн явуургүй арга уу гэж  “Тэнгэрийн чуулган” бүлгэмийнхэн эргэлзэж байна.