Сүүлийн арав гаруй жил чинээлэг монголчууд барилга барих кампанит ажилд нэгдсэн. Яг л сонгуулийн сурталчилгаа шиг шууруулж өгсөн дөө. Хотын төвд одоо алга дарам газар ч алга. Нэг нэгийг нь дэрлүүлээд барьчихсан барилгуудын зохицол, өнгө зүс, үзэмж дизайн,архитекторын шийдэл энэ тэрийг ярихын хэрэг алга. Нэгэнт л барьсан бол “Вандан тас”. Юун хотын төв байтугай дархан цаазат,төрийн тахилгат Богдхан уулыг ч барилгаар дүүргэсэн. Арай л Цэцээ гүний орой дээр барилгын шав тавьсангүй. Монголын том, жижиг, дунд зиндааны дарга нар, алт эрдэнэс ухаж баяжигсад, нэр нөлөө бүхий товарищууд, алтан үеийн наймаачид гээд өнгөтэй мөнгөтэй болгон нийслэлийн газар руу хайр найргүй дайрч хувааж авцгаасан. Өнөөдөр нийслэлийн унаган иргэдийн эрүүл, аюулгүй орчинд амьдрах эрх зөрчигдөх нь бүү хэл мартагдсан. Хотын хаана л бол хаана хүүхдийн тоглоомын талбай, хөгшдийн нарлах сүүдрэвч аль хэзээ эрх мэдэл, хөрөнгө мөнгөтэй хүмүүсийн хөлд гишгэгдсэн. Харин хотын дарга Э.Бат-Үүл аргагүй хотын унаган хүүхдийн “шийр” зааж, Улаанбаатарынхаа газар шороо, ард иргэдийнхээ төлөө тэмцэж байна. Гэхдээ хүч мөхөсдөж байгаа нь ч цөөнгүй. Хэд хоногийн өмнө Хан-Уул дүүргийн нэгдүгээр хорооны нутагт байрлах “Адоре пропертиз” компанийнханд төрийн төмөр нүүрийг ёстой нэг харуулж чадлаа. Тус компанийн барьсан 13 давхар барилга олон айлын цонхыг овоолсон шавраараа халхлан дээрэлхэж, нар харах эрхэнд нь халджээ. Айлын хананаас 75-хан см зайд байшин сүндэрлүүлнэ гэдэг мөн ч “бүдүүн” хүзүүтэй хүний санаа даа. Тэнгэрийн дор төрж, төрийн дор захирагдана гэдэг хууль “Адоре пропертиз”-д хамаагүй гэж бодсон бололтой. 2006 оноос барилгынхаа суурийг цутгаж эхлэхдээ “нар бүү хаагаач,цонх бүү таглаач” гэсэн ард олны үгийг нохой хуцсан чинээ тоосонгүй. Оршин суугчид “дүлий” барилгачдыг чадлаараа эсэргүүцэн шүүх цагдаад хандаж олон жил үйлээ баржээ. Нийслэлийн Захиргааны хэргийн шүүхэд нэхэмжлэл гаргаж, өчнөөн жил тэмцсэний үр дүн 2009 онд гарчээ. Хэдийгээр уг барилгын газрыг хууль бусаар олгосныг гурван шатны шүүх тогтоож, оршин суугчдын магнай тэнийсэн ч “Адоре пропертиз” шүүхийн шийдвэрийг биелүүлсэнгүй. 2011 онд Улаанбаатар хотын захирагчийн 33 дугаар захирамжаар Дээд шүүхийн хяналтын шатны захиргааны хэргийн шүүх хуралдааны 173 дугаар тогтоолыг хэрэгжүүлэх зорилгоор “Адоре пропертиз” ХХК-ийн зочид буудлын С блокийг албадан буулгаж, газрыг нь чөлөөлөх захирамж гаргажээ. Гэвч дөрвөн жилийн дараа буюу 2015 оны гуравдугаар сарын 11-нээс тус барилгын С блокийг буулгаж эхэлсэн юм. Энэ бол үнэний төлөө тэмцлийн үр дүн байлаа.
Олон жил нар харах эрхээ хасуулсан хүмүүс “Монгол Улсад хууль хэрэгждэг юм байна” хэмээн баярлаж сууна. Гэхдээ тэд хэр удаан баярлах бол. Учир нь зочид буудлын зориулалтаар барьсан уг 13 давхар барилгыг бүхэлд нь буулгах бус зөвхөн С блокийг л буулгах бололтой юм. Хэрхэхийг харж л байя. Хэн өнгөлөг мөнгөлөг байна,тэр бусдыг дээрэлхэж болно гэсэн хууль Монголд байхгүй. Тун удахгүй хууль зөрчиж босгосон барилгуудыг толгой дараалан буулгах их хөдөлгөөн өрнөж магадгүй.
Сэтгэгдэл (6)