Монгол зураач Бадамын Отгонтүвдэн эх орныхоо нэрийг дуурсгаж яваа авъяаслаг залуу. 1984 онд Улаанбаатар хотод төрсөн. 1991-1999 онд “Эрдмийн ундраа” цогцолборт суралцаж төгсөөд Ражив Гандийн нэрэмжит Үйлдвэрлэл урлалын дунд сургуулийг арьсан урлалын мэргэжлээр дүүргэжээ.
12 настайдаа Чех улсад зохион байгуулагдсан хүүхдийн зургийн уралдаанд тэргүүн байр эзэлж байсан байна . Энэ үеэс уран зурагт “шунан” дурлаж, бийр будагтай нөхөрлөхийн гайхамшгийг мэдэрчээ. 2003 онд Японы зураач Тамукийн зарласан бодит зургийн уралдааны тэргүүн байранд шалгарсан. 2004-2008 онд ОХУ-ын Воронежийн урлагийн академид суралцаж байгаад төгсөх жилээ Санкт-Петербургийн И.Е.Репиний нэрэмжит уран зургийн академид шилжин сурч төгссөн байна.Тэрээр ОХУ-ын Санкт-Петербург хотод уран бүтээлээ туурвиж, алдарт И.Е. Репиний академид багшилж байна. 2006 оноос эхлэн ОХУ-ын Воронеж, Москва хотод хэд хэдэн удаа үзэсгэлэнгээ гаргасан нь олны таашаалд нийцжээ. Б.Отгонтүвдэн 2012 онд ОХУ-ын Санкт-Петербургийн зураачдын холбоонд элссэн бөгөөд хамгийн залуу гишүүн нь юм.
Сэтгэгдэл (4)