УИХ-ын гишүүн, МҮЭ-ийн холбооны" ХҮНДЭТ ЕРӨНХИЙЛӨГЧ "Босоо Ганбаа хэсэг нөхдийн хамтаар ХҮНИЙ ТӨЛӨӨ НАМ байгуулж хүчин зүтгэхээр ажилдаа шуурхайлан орсон сурагтай. Ажилчин ангийн эрх ашгийн төлөө анхнаасаа л тэмцэл хөдөлгөөнөө эхлүүлсэн түүний хувьд 2012 оны сонгуулиар аж үйлдвэрийн бүс Хан-Уул дүүрэгт нэр дэвших байсан ч тодорхой шалтгаанаар нэрээ татаж, алтан нутгийнхаа анд, улс төрч Лу.Болдод сонгогдох боломж олгон Дархан-Уул аймгийг зорьж тэндээс өндөр саналаар сонгогдсон гэдэг. Цагаан хоол идэж, цалингаас цалингийн хооронд амьдардаг эрхэм гишүүн маань өглөө ажилдаа хоёр зээрдээрээ таварган ирж, өдөр тийш хүүхдийнхээ цүнхийг үүрч хичээлд нь хүргэж өгөөд үдийн цайнаараа өрх гэр олон нийтийн ажлаа амжуулж оройхон тийшээ олныхоо унаагаар харьдаг журамтай болоод удаж байгаа нэгэн. Улс төрчдийн хэллэгээр түүний нэр хүнд хар массд тун сайн байгаа. 2013 оны ерөнхийлөгчийн сонгуульд санаа байсан ч Эби ерөнхийлөгч маань аятайхан аргалж байгаад өөрийгөө дэмжүүлээд авсан. Одоо бол түүний нүдэнд МАН,АН хоёр хогийн ургамал шиг харагдаж ам л нээвэл арчаагүй худалч хулгайчаар нь цоллож айлгахгүй ч гэсэн амраахгүй байгаа. Сонгуулийн жил ойртох тусам түүний хараа хурц, мэдрэмж өндөр, үг цэцэн болж боломжийн өөрчлөгдөж хувирч байгаа. Босоо Ганбаа тун удахгүй журмын нөхөд Ц.Даваасүрэн, Г.Уянга, Х. Болорчулуун нарынхаа  хамтаар шинэ намаа түмэн олондоо тунхаглан зарлаж уухайлан давших нь ээ... Улс төрчийн алсын хараанд нь 16,17 оны сонгуулиуд аятайхан харагдаж байгаа бололтой...