УИХ-ын өнөөдрийн хуралдаанаар Шинэчлэлийн Засгийн газрыг бүрэн бүрэлдэхүүнээр нь огцрууллаа. Үүнтэй холбоотойгоор УИХ дахь АН-ын бүлгийн гишүүн Д.Зоригтоос дараах тодруулгыг авлаа.

 -Ерөнхий сайдыг огцруулах асуудал яригдаж байгаа үед намын бүлэг бүрэн ирцээ хангаж чадаагүйгээс Засгийн газар огцорлоо. Тиймээс ирцээ бүрдүүлээгүй гишүүдэд ямар хариуцлага тооцох вэ?

-Засгийн газрын тэргүүнийг огцруулах тухай асуудал яригдаж байгаа үед намын гишүүд ирцээ бүрэлдүүлж ирээгүй тохиолдолд намаас хасах дүрмийн заалттай. Намаас хөөх асуудлыг энд шийдэхгүй. Намын хяналтын зөвлөлийн шийдвэр гарна.

-Танай намын “Шонхор” фракцийнхан бараг ирсэнгүй?

 -Манайхаас долоон хүн ирсэнгүй. Өчигдөр гэхэд энэ хүмүүсийн нэлээд нь Засгийн газраа авч үлдэнэ гэж байсан. Өнөөдөр үл ойлгогдох, бидэнд мэдэгдэхгүй шалтгаанаар тэд ирсэнгүй.

-Шинэ Засгийн газрыг удахгүй бүрдүүлэх ёстой. Цаг хугацааны хувьд хуулиараа хэрхэн зохицуулагдах вэ?

-14 хоногийн хугацаанд шинэ Засгийн газрыг бүрдүүлэх ёстой.

 -Дараагийн Засгийн газрын хувьд намууд зөвшилцлийн ширээний ард суух хэрэгтэй гэдгийг УИХ дахь МАН-ын бүлгийн гишүүд хэлж байсан. Тэгэхээр зөвшилцлийн ямар хувилбар байж болох вэ?

 -Улс орны эдийн засаг, нийгмийн байдал амаргүй байна. Ийм үед парламентад суудалтай намууд зөвшилцөж таарах байх. Яриа хөөрөө эхлэх байх.

-Ирэх оны төсвийг энэ сарын 15 гэхэд батлах ёстой. Заасан хугацаандаа амжих боломжтой юу?

-Ерөнхий сайд, Засгийн газар огцорчихлоо. Гэхдээ сая үүрэг гүйцэтгэх хүмүүсийг томилсон. Тэгэхээр Шадар сайд ахлаад, төсвөө батлуулах байх.

 -Энэ Засгийн газрын бүтцээр төсвийг батлах нь байна. Гэтэл дараагийн Засгийн газрын бүтэц, бүрэлдэхүүн өөрчлөгдөнө шүү дээ?

-Тэгэхээр төсөвт тодотгол хийнэ гэсэн үг.